سينير لار آسلانيب آياق لاريمدان

قورخولو بير توپراق گؤزله يير مني

سينير لار سورونور من ايله بوگون

سينير لار اوجالسا آخير پوزغون دور

اوره گيم چيرپينير آيريليق چتين

سئويملي اؤلكه ده ن آيريلماق گه ر گين

سينير لار داليندا دوغولان قورخونج

كؤنلومه سانجيلير سونگو تك بوتون

يولوموز آرادا يالنيز ايلگي دير

سورونوب ديز له رله ، آغير يوك ايله

كؤچوره م ، كئچيره م آلچاق- اوجاني

ديز له ره يوك اولان آياق لاريمدي

بو يوكه يوك اولان مين له ر جه قابار

هر قابار باغريندا داشايير سئوگي

يئتيره م دنيزه لام دوروب دنيز

باغريني آچار كه ن چاغيرير مني

او آلير باغرينا مين له ر قاباري

قاليرام يالنيز من ياليق آياق لا

قابار لار باغريندا سئوگي له ر كؤچور

هر باليق دنيز ده او بيرين سئوير

سئوگي ده اونلارا خوش حيات وئرير

قاييديب اؤلكه مه بوتون اؤلكه مي

چاتيرام چيگنيمه بوتون لوك ايله

هر سئوگي اولوب دور دالغالي دنيز

دالغالار گؤزله يير بوتون اؤلكه ني

چئويره سئوگي يه درين اؤفكه ني

بير آندا بير داملا گؤزومده ن آخير

اوكيانا چئوريلير باغريني آچير

اؤلكه ني ، اؤفكه ني ،سئوگي ني ، مني

دنيزي ، دالغاني باغرينا باسير