دؤردلوك له ر-آلپار سولدوزلو
چهارشنبه 20 آذر 1392
+0 به يه ن
دؤردلوك له ر-آلپار سولدوزلو
نئيه «من – من» دئييريك «من» يئرينه «بيز» دئيه غين
سون وئريب آيريليغا بيرليكي بيز ايزلي يه غين
كؤنلوموزده ن چيخاريب اؤفكه له رين گور آلووون
سئوگي نين هم باريشين بير گئجه قاپيسين دؤيه غين
***
«قاني قانلا يوماييب لار» نه گؤزه ل سؤزدو بو سؤز
ظاليمين جهليني عفو ائيله اونودما سوچونو
قانا قان ائتمه بو گون فايداسي يوخدور بو ايشين
سوچلونون يوخ، ظولمون باغلاگينان قول- قيچيني
***
كؤنلومو ويران ائديب سه ن آي آدين معمار قويان
مين نفرمعمار ييغيشسا چوخ چتين دير تعميري
بير يارا ووردون بو اوزگون كؤنلومه ياردين درين
مين نفر ملحم قويان اولسا چتين دير تدبيري
***
وارليغيم دار اوسته كيمليييم سورگون
يوردوموز تاپدانير خالقيميز اوزگون
ديليميز ياساقدير ،اؤلكه ميز پوزغون
يول بودور اويانماق- دايانماق دوزگون
***
نه گؤزه ل خاطيره دير كؤنلومه قويموشدون آياق
سورگون ائتديم يوخونو تاكي قالا گؤزله ر اوياق
چيرپينان كؤنلومه اوزگون ديله ك اولموشدو داياق
نه كؤنول بيلدي نه گؤزله ر نه زامان كؤچدو قوناق
***
آغارميش تئل له ر ده ن سؤز آچماق ياساق
دال اولموش بئل له رده ن دانيشماق ياساق
دار گونده بير – بيره قووشماق ياساق
سارالميش گول له ر ده ن ياد اولماق ياساق
***
آيدين فيكير له شيب آيدين چاليشماق
ياساقدير ياساقدير ايل له ر دير ياساق
مين ايلليك اويخو دان اويانماق- دورماق
اوزگون له سورونمه ك ياساق دير ياساق
***
بيزله ري توپراقدان ،توپراقي بيزده ن
آيريليق سئوه ن له ر سورگون ساليب لار
بولبولو چيچه ك ده ن گولو بولبول ده ن
ايل له ر دير قهر ايله اوزاقلاديبلار
سئوگيني كؤنول ده ن ،كؤنلو سئوگي د ه ن
آييريب آيريليق حؤكمون يازيب لار
