سئودالي كؤنول-آلپار سولدوزلو 1391
شنبه 30 اردیبهشت 1391
+0 به يه ن
سئودالي كؤنول-آلپار سولدوزلو 1391
سئوديم گئنيشلي
كؤنلومون بوتون لوك ايله
اسيرگه مه ديم
سئوديم بوتون وارليغيملا
تام دويغولاريملا
اوره گيم بوتون سئوگي ايله
دولغون ايسته ك له ر له
آيدين ديله ك له ر له
چيرپينير
سئويلمه ك گؤزله يير
سئومه ك اوزه رينده
***
بو سئودا
ايلله ر بويودور
بير چيرپينان كؤنول ساريندان
سونولور
نه زامان سئويله جه ك
نه زامان سئويله جه ك
سئودالي تام سئوه ن كؤنلوم...
***
اؤزوم سئويلمه ك گؤزله ميره م
ائله بيل كي سئويلمه ك اوچون يارانماميشام
آما كؤنول يارانيب
سئويب سئويلمه ك اوچون
كاش بو گؤزه ل گرچه يي
بوتون كؤنول له ر
دوشونوب قانايديلار
حاييف
قارانليق، سويوق كؤنول له ر
داشا دؤنموش اوره ك له ر
سئوداسيز ، سئوگيسيز ، اينصافسيز اولماغا گووه نيرله ر
***
ايندي بوتون سئوگيمي
بيرده سينيق كؤنلومو
چيرپينان اوره گيمي
چاتميشام يورقون ببه ك له ريمين چيگنينه
بير باشقا آليجي كؤنول آختاريرام
حؤرمه ت له باغيشلايام
بوتون سئودالي كؤنلومو
***
آييق اولان زامان
بير آليجي تاپانميرام
اومودومو اويخويا باغلاييرام
مين له ر آليجي صف باغلاييبلار
ان غرورلو ساتيجي كيمي
آليجي لاري بير بير رد ائديره م
بير ادعا سيز
هاي هاوارسيز، گئنج آليجي
بوتون وارليغين، ايستي، چيرپينان كؤنلونو
ايكي اللي توتوب
داشقين دنيز كيمي گؤزله رينده
دوزگون سئوگي
قوتسال دويغو
آيدين ديله ك دالغالانير
***
سئوينجه ك سس له ييره م اوجا سس له
تاپديم آختارديغيمي
بيرده اويانيرام
اويخودا ، رؤيامدا
اسكي آرزيما چاتماغي دوشونوره م
اويخودان آيينماق ايسته ميره م
ابدي اويخويا گئديره م
هئچ بير زامان آيينماق ايسته ميره م
چون كي بير كره سئويلمه ك گؤرمه ديم
اوياق زامان وفاسيز دونيادا
***
سئوديم سئويلمه ديم گرچه ك ده ن بير گون
اويخومدا سئويلديم
قدريني بيلمه ك
گئنج آليجي نين گؤزو ساتاشدي
كؤنلومون درين يارالارينا
اوره گيمين سايسيز حسره ت له رينه
آياق لاريمين قات قات دويونله نميش قابارلارينا
بير داملا ياش گؤزونده ن آخدي
بؤتون سئوگيمله او بير داملانين بورغانلاريندا
اوزه اوزه بوغولورام
بوغولا بوغولا اوزوره م
ابدي سئوينج له
يورولماز اينانج لا
قيراق سيز سئوگي دنيزينده
اوزولمه يه ن ايسته ك له
اوزه جه يم
ياز-1391
