ديرچه لميش وارليق ( دوقتور پرويز محمدي - سولدوز)

اينسان ديري دير تا چاليشا

دورمويا بير آن

دالغا دايانار كن

داهي دالغا اولا بيلمز

«آلپار سولدوزلو»

ديرچه لميش وارليق

به نقل از نشريه ي نويد آذربايجان

دوقتور پرويز محمدي –  سولدوز

وارليق قورويانلار ، كولتور وورغونلاري ، ديل عاشيقلري ، توپراق سئونلر ، اوره كلرينده اومود بئجه رنلر، يول بيرليك له ، باغيمسيز بير قزئت و درگي ساحه سينده چاليشماغي ان بؤيوك شرف و اوستون گؤره و سانيرلار . آغير يوك چيگينلرينده دوغودان باتي يا يوخ ، باتي دان دوغويا ، ايشيق داشي ييرلار .
” نويد آذربايجان ” عنوان ايله تانينان ، زنگين بير درگي ده چاليشان لار ، كولتور سئون خالقيميزين دالغالي كؤنوللرينده ياشاماغا و آيدين ليق بسله ين اوره كلرده قوناق اولماغا گووه نيرلر . هر ايلگي بير تئل ايله باغلانسا دا او تئلي ساخلاماق و ايپكدن توخونموش و اوزولمه ين ايلگي يه چئويرمك  گره كدير .” نويد آذربايجان ” و خالق آراسيندا يارانان ايلگي ان اسكي ، داواملي و اوزولمه ين بير ايلگي دير.  ” نويد آذربايجان ” ايللر بويو ياييليب ، كؤنوللرده چيچك له نيب گول آچيب و قالارغي سئوگي كيمي اوره كلرده يئر تاپيب . ايندي بوگون نئچه ايلدن سونرا ياييلماغا باشلايير، بللي دير تانري نين عنايتي ايله ، اوسانماز چاليشانلاري نين همتي ايله و خالقيميزين يول بيرليغي ايله اود يوردونون عطيرلي گوللري تكين چيچكله نيب ، گول آچاجاق ، گؤزلليك لري گؤزه چكيب و اومود ياراداجاق . اينجه سئوينج لري قارينج – قارينج اؤلكه ميزده ياشاديب و اؤز صلابتي ايله” ياشاياجاق” . چونكي : ” ياراديب ياشادان ابدي ياشاياجاق ” .آيدين ليق سئون قلم ، گئجه نين توكه نمه سين ، قارانليق باغريندان سحرين دوغولماسين ” نويد ” وئرير .
ايشيق يايان قلم ، اؤلكه نين قوراقين يئر اوزوندن اوزوب گؤيون يئددينجي قاتيندا قورور و ايشيق سئونلري گؤزل آ يلا ، پارلاق اولدوزلارلا ، گولر گونله و آيدين اولكه لرله  قونشو ائيله يير .
دوزگون قلمين هارايينا و باغيرتي سينا شيمشك لر شاخيب و قاراقاباق بولودلار پارچالانير .صلابتلي قلم قابارلي اللرله شرفه اويغون اولان ايستك لري بولودلارين تارلاسيندا اكيب و دالغالي گؤزلرينين جوشغون پينار ايله سووارير و داملا – داملا گؤز ياشي ايله پاسلانديريلميش گوزگولردن قات – قات پاسلاري سيلير و قيوريليب – آچيلان كؤنول يارالارينا ملحم اولور . دوغو دا دوغولان گون كيمي هر گون مين لر قوجاق گونش داشي يير و ايشيق سئون اينسانلارا ، گونش گؤزله ين گؤزلره ، آيدين ليق بكلين كؤنول لره اومود وئرير .كسگين قلم قيشين قارانليق دوستاقيندا ايتگين يازي آرايير ، خزان وورموش خيال لاري شاختا دونداران رويا لاري ، پوزقون اومودلاري سولغون ديلك لري و دونداريلميش دويغولاري چيچك لنديرير و وارليق دنيزينده اوزوب ، دالغالارلا دالغالانيب ، كئچميشين ديرلي اينجي لرين اوزه چيخاردير و خالقلارين وارليغين و شرفين قورويور و بونا گؤره :
تانري قرآن دا قلمه آند ايچيب
يازقي سيني هر نه دن اوستون بيليب
سوسمايان قلم ، خالقي سسله يير ، چاغيرير و اوجا سسله باغيرير :
اويانماق ، آيينماق گركدير گره ك
درين بير باخيش لا دونيايا باخين
آچيليب ، جالانيب
گئچميش يولوندا
وارليغين بوقچاسي
آيدين گؤرونور
بوغولموش دويغولار
پوزقون آرزيلار
تاپدالانميش ايستك لر
سولغون ديلك لر
توپراغين اوستونه
داغيليب بوتون
تاريخ تارلاسيندا 
ديرچه لن ” وارليق”
گؤزله يير چاليشاق
گول آچسين بوگون
كؤنول سيغناقيندا
توپراق باغريندا
سارسيلماز و اوسانماز قلمين بير ديله گي وار مين بير جاني ، هر جانيندا مين بير آماجي و او ده يرلي “‌ديلك ” ياشادماق دير اود يوردونو قارينج – قارينج كؤنول لرده و قوروماقدير قاباريق وارليغيني ، اولاي لار اوزرينده . بئله بير قلم قارانليقدان كؤچوب ، ايشيق ليغا چاتماغي گرچك لرين آغير يوكون داشاييب ، حقيقت يولونا ايز سالماغي اؤزل گؤره و بيليب و گؤزل آماج سانير و كؤنلوموزون ساحه سينده يابانجي دويغولارين آت چاپمالاريني و دوغال ايستك لر و دويغولاريميزين يابانجي آياقلارين آلتيندا ازيلمه سيني چكه نمير و اؤزگورلوك زيروه سينه چاتماق اوچون اوجاليق سئون قارتال كيمي قانادلانير ، قاناد چالير و اوجالاردا اوچماغي تجروبه ائدير و گؤيون يئددي نجي قاتيندان اوجا سسله سسله نير :
گرچك عاشيق لري ! حاق وورغونلاري !
حقيقت قويمايين ترسينه دؤنسون
گرچك گره ك اولدوز ساياق پارلاسين
نور ساچان اولدوزو  قويمايين سؤنسون
سوسموش قلم بو اوجا هارايي ائشيدير ، اوره گي چيرپينير ، بارماق لارلا هاماش اولور گؤز ياشي تؤكور كاغاذلا سس سسه وئريب پيچيلداشيرلار. پاييز قوشلاري كيمي سطيرلرين بوداقلاريندان او بيري بوداقلارا قونور عاشيق لارين باغريندا كي ساز كيمي سيزلايير و گرچك وورغونلارينا قاريشير و بئله سسله نير :
قلم ندير؟ يازماق اوچون
ظولمات كؤكون قازماق اوچون
گؤز اونونده حاق سؤزلري
قاطار – قاطار دوزماق اوچون
***
يونولماييب آزماق اوچون
خوش ايلقاري پوزماق اوچون
ناحاقليغين آجيليغين
اوره كلره سيزماق اوچون
بئله ليك له بوتون قلملر آغير گؤره ولرين دويورلار و گرچك لري گؤزه چكيرلر . مينلر ايلقيم كي اؤزلرين دنيز شكلينده گؤستريرديلر ايتيرلر و دوز يول لار گؤزوموزون اؤنونده بيتيرلر .
( توپراق ) آغير اويخودان اويانير ، نفس چكير ، هوسله نير و چيچك له نير. يارالي قارتال لار اوخلانميش قاناد ايله اونودولموش اوچوش لارين يادا ساليب ، قانادلانيب و قاناد چاليرلار. زيروه بزه نيب ، آماج باغرين آچيب ؛ صلابتلي اوچقان قارتاللارين يارالارينا ملحم قويوب اونلاري باغرينا باسا .
ايندي گونش ساياق، ايشيق ساچان ، آنلاييش يايان و اينام پايلايان ” نويد آذربايجان ” ساي سيز سئوينج له ياييلماقا باشلايير و بيز گلجه يه گؤز تيكميشيك كي :
گؤزلردن آخان ياش اولاجاق مي  سئل ؟
سولونموش دويغولار آچاجاق مي  گول ؟
ويجدانين قولاغي ائشيدمز اولسا
تاپدانميش ايستك لر آچاجاق مي  ديل ؟
***
باغيمسيزوارليغي
بوتؤو كيمليكي
ده يرلي تاريخي
اؤزل كولتورو
قاباريق كئچميشي
گؤزل توپراغي
بير خالقين آماجين
اوستون بير ديلين
اونودماق ، اونودماق
اونودماق اولماز
هيجران پرده سينده آسيميلاسيون ماهني سين چالانلار گؤز تيكيبلر بير بؤيوك خالق وارليغين دان ، كيمليگيندن ، تاريخيندن ، كولتوروندن و ان گوجلو و اوستون ديليندن و بوتون ايستك لريندن ال چكيب آيريلسين و گئتديكجه اوزاقلاشسين . داها بيلميرلر كي وارليق قورويانلار گونشين قاپيسين خالقين اوزونه آچيب لار و دامارلاريندا دولانان قان وارليغين جوشغون پيناريندان جوشور و قانادلاريندا اوچوش جسارتي گون به گون آرتير و بيليب لر سئوگي لره گؤز يومماق اولماز . ايندي كؤنول ائوينه پارلاق اولدوزلاري قوناق ائديب ، قارا قاباق بولودلارين و بوتون قارانليقلارين قوپاراغين گؤتوروب سورگون سالماق ، ظولماتين كدرلي اوره گين اوزوب و باغرين دئشمك و چيسگين دومانليغين كؤكسون سؤكمك و سئوگي نين گور اوجاغين گورله نديرمك ، زنگين آخان و شاققيلدايان شلاله لرين و اوجا هارايلي وولكانلارين و يام – ياشيل يازين گؤزلليك لرين گؤزه چكمك ، كسرلي قلملرين گؤره ويدير .
اوزاق دوشن اولدوزلارين
قاش – گؤز آتان يالقيز گونون
آيين – شايين اويموش آيين
اولكر آدلي يئددي يارين
كؤينك سيخان بولودلارين
ووقارلي قوتسال يوللارين
شانلي توپراق آل بايراقين
قارلي – قارلي اوجا داغين
گيزلي – گيزلي گيزلريني
باسديريلميش ايزلريني
آچيق – آچيق آچيقلاماق
يازارلارين گؤره ويدير

يازان : دوقتور پرويز محمدي - سولدوز