بير داملا گؤز ياشي
سه شنبه 13 تیر 1391
+0 به يه ن
بير داملا گؤز ياشي-آلپار سولدوزلو 12/04/1391
تاپشيرين كؤنلومو
آرپا چايي نين بورغانلارينا
دالغالاري ايتيلدين جانيما
ساراسيزلاميشام
دردله ري چاتديم
كؤنلومون اوزگون چيگنينه
درمان اولدو بوتون يارالاريما
اوزگون چيگنيم اونوتدو يارالارين
آياقلاريم گوج تاپدي
هر بير يولو دوز گئتمه يه
بولانديريق سولاري
دورولدور باخيشيم
بوغازيم چيمچه شمير داهي
دنيز له ر ، اوكيان لار
بير اوووج سو سانيلير
بير هورتومدا اوكيان لاري باشا چه كه ن له ره
قورخونج بورغانلاري ان درينليغي
دالير جانيمين سوزقون كؤنلونه
دونيا ييخيليب آياقلاريمين آلتينا
آدديم لاريمي پوسور
تله سيك كئچمه مي گؤزله يير
دايانيب آياقلاريم
بوش بوشونا كؤچمه ره م
قاييديرام ايلك گونله ريمه
آنام يوكون يئره قويان زامانا
آغلاماق يئرينه گولوم سه ييره م
بير آن دا بوي آتيرام
آتيمي يهه ر له ييره م
توپانچانين، قيلينجين يئرينه
ده ده قورقود بابامين سازين
آسيرام چيگنيمه
خنجرين يئرينه
نسيمي نين قانا بويانميش قلمين
بارماقلاريمين آراسيندا ساخلاييرام
اؤفكه لي ، اؤجلو باخيشلاريمي
ببك له ريمين قانلي دنيزين ده ن چيخارديب
كئچميش گونله ريمين ، زنگين تاريخيمين قويلاقلاريندا
قويلاييرام
آنامين دايانميش اوره گين
جان سيز جسدين
بوتون سئوگيسي ايله
چاتيرام اوره گيمين چيگنينه
قاتار- قاتار قورشونلارين يئرينه
قوجاق – قوجاق قيزيل گول گؤتوروب
آغ آتيمين
بوينون قوجاقلاييب باش باشا داياييريق
آتا مينمه ييره م
بيرليكده يول گئديريك
آياقلاريمين آلتينا دوشه ن دونيا
آسلانيب آياقلاريم دان
دايانميرام
آرپا چايي ساراني
دوم آغ گئيينميش تاپشيريقي
بوتون اويخويا گئتميش گؤزه ل ليك له ر له
دالغالاردان آليب
يوردومون تاريخي نين قانلي صحيفه له رينين
سينه سينه
اوزان لارين سازلارينين
باغرينا
درين باخيش لي شاعير له رين
دويغولارينا تاپشيرير
منده اؤزومو تاپشيريرام
بير داملا گؤز ياشيما
