قاراداغ شرفلي توپراغ-آلپار سولدوزلو 08/06/1391
چهارشنبه 22 شهریور 1391
+0 به يه ن
قاراداغ شرفلي توپراغ-آلپار سولدوزلو 08/06/1391
قاراداغام ، قاراداغام
شان – شرف لي توپراغام
قاراباغا داياغام
من آياغا دوراجاغام
تاريخ ده من باش اوجايام ، اوز آغام
ساريشميشام بولودلارا ، گؤي له رده
اينسان لارا ياخينام
آلچاق لاردان اوزاغام
***
باخما ايندي توپراق اوسته ياتميشام
يوخدور يوخوم
گئجه - گوندوز اوياغام
آذربايجان اؤلكه سينه چتين ليك ده داياغام
ايندي منيم سؤزوم واردير مين كيتاب
سؤيله ييره م سويداشلارا
مين اومودلا گؤزله ييره م من جاواب
تاريخ بويو مئيدان لاردا اوجامان ليق ياراتميشام
دار گونله رده ياشاماغين سئوداسيني
من باشيمدان آتميشام
***
ايندي منيم دؤرد بير يانيم
گؤز قيرپمادا تيتره ييشده ن ويران اولوب
گؤز گؤرور سه پئيكه ريمده
مين له ر درين يارادير
بو درد له ري سويداشلارلا پايلاشديم
اوره گيمين سوفره سيني خالقيميزا گئن آچديم
ايندي خالقيم ملحه م اولوب مين له ر اومود يارادير
بو گرچه يي بيلمه لي ييك
آغير درد ده ن ، باغيرتي دان
اوشاق لارين ، قادين لارين
دوداقلاري پاتلادي
آنالارين الده ن وئره ن بالالارين
باغير لاري چاتلادي
بير آي اولدو
دئپره م وورموش وطن داش لار
توپراق اوسته ياشايير
گلين بير آن اؤزونوزو
قويون دئپره م ووران لارين يئرينه
آمانسيز قيش- شاختا گلير قاباقدان
هله كرپيج – كرپيج اوسته قويولماييب
چوخ كند ده
يوز مين ائولي چادير لاردا يئرله شيب
آغير قارلا ، بوران گلير
يول تاپاغين ، چارا ندير؟
***
زامانيندا ائشيد مه ديك
خالقا يانان شاعير له رين ، يازار لارين سؤزله رين :
«اؤزگه له رين چيراغينا
ايل له ر بويو ياغ اولدوق
دار گونله رده يابانجي يا بيز جاندان داياغ اولدوق
اؤزگه له ري قوروماغا
سنگر اولدوق ، ياريلماز بير داغ اولدوق
جانيميزي يانديرماق لا
اوجاقلارين يانديرديق
هر ساحه ده ، اوجامانليق مئيدانيندا
قئيره ت له بيز بايراقلارين قالديرديق
شان – شؤهره تين شئيپورونو
شرف ، غورور ، ايفتيخارين
بؤيوك تويون ، اوجا سس له
بيز يادلارين ، آدلارينا چالديرديق»
***
ايندي بوگون
بيزيم دوغما ائل له ريميز داردادير
آيدين دير كي قيش گلمه ميش
كيچيك – بومبوز چاديرلاري قاردادير
بللي دير كي قاراداغ دا
پاييز گلدي شاختادير
قار – بوران قاباقدادير
شك ائيله مه ، كئچميش له ر تك ، او بؤلگه يه
قيلينج كيمي قيش گلير
دئييب له ر كي :
«گؤرونه ن كنده هئچ زامان
بلدچي لازيم دئييل»
بو دار گونده
«ستارخان »-ين آنا يوردو ، قاراداغ ،
مين اومودلا ، اود يوردونا گؤز تيكيب
سان كي سردار اوجا سس له باغيرير
شرافتلي قادين لاري
شهامتلي اره ن له ري
جسارتلي ايگيد له ري
يارديم اوچون چاغيرير
***
ايندي بو گون « آذربايجان » خالقينا
« سيناق گونو » سانيلير
تك تك بيزيم سويداش لارا ، ديلداش لارا
تك تك وطن داش لارا
قئيره ت ، هيممه ت ، شرف گونو تانيلير
بو «سيناق» دا
هر وطن داش ، سويداش ، ديلداش
هر بيريسي گره ك اولسون
خياباني ، سردار ، سالار
زينب پاشا ، حسين باغبان
اينسان سئوه ن، خالقا يانان
***
آي وطن داش !
« آذربايجان » مين گؤز ايله گؤزله يير
خالقيميزين يارديم لارين ايزله يير
وطن بو گون اوجا سس له باغيرير
اينسان سئوه ر اينسان لاري چاغيرير
بو مئيدان دا
بير ليك ، شرف ، اوجامانليق اؤرنه ك له ري
هاردادير ؟
قئيره ت ، هيممه ت ، ايگيدله رين دسته ك له ري
هاردادير ؟
خالقيميزين درين – درين دويغو لاري ، ديله ك له ري
هاردادير ؟
« آفاق » ساياق آلپارلارين ايسته ك له ري
هاردادير؟
***
ايندي بوتؤو آذربايجان
بير ووجود دور بير اوره ك
شوبهه سيزدير او بير اوره ك
چيرپينار كه ن بوتون قاراداغدادير
اود يوردونون پارچالانميش اوره گينده
يالنيز بو گون بير ايسته ك وار بير ديله ك
ايسته ك بودور ، ديله ك بودور :
وئران ليغين ، قارا گونون ايزله ريني
توز بوروموش قاراداغين اوزونده ن
ميلله ت سيله
آنالارين الده ن وئره ن اوشاقلارين
گؤز ياشلارين ، گؤزونده ن
ميلله ت سيله
توپراق سئوه ر ميلله تيميز
قاراداغين آبادليغين
بؤيوك فورصه ت
شرف – شؤوكه ت
ميللي بير عيززه ت بيله
ايه ر مييله ت اونودماسا بير بيري
اوندادير كي :
« دونيا وار كه ن قالاجاق ميلله ت ديري »
آفاق :
آ= شهيد آذريون – ف = شهيد فتحي پور- ا = شهيد اسمزاده – ق = شهيد قاسمي (سولدوزون 1385 خورداد شهيد له ري)
