« ائل گوجو ، سئل گوجودور »- آپار سولدوز لو07/06/1391
چهارشنبه 22 شهریور 1391
+0 به يه ن
« ائل گوجو ، سئل گوجودور »- آپار سولدوز لو07/06/1391
تيتره يه نده اهرين ، ورزيقانين يا هئريسين
بير بوجاغي
چيرپينير « آذرِبايجان » اوره يي
***
هر وطن داش يا كي ديلداش
گؤره وين بيلمه لي دير
***
بيلمه ديك خالقيميزين
ائوله ري ويران اولاجاق
***
بيز موصيبه ت گؤره نين
گؤز ياشيني سيلمه لي ييك
***
دوققوز اينسان ايتيره ن خيردا قيزين
اوجا سس له هايينا
هاي وئريب
يارديمينا گئتمه لي ييك
***
آي وطن داش ! باجي ! قارداش!
ديلي باغلي ، گؤزو ياشلي اوشاغين
جان ياخان گؤز ياشيني
كيم سيله جه ك؟!!
بو درين فاجيعه ني كيم دوشونوب
كيم بيله جه ك ؟!!
يارالي « آذرِبايجان » وطنيم «اود يوردو»
سني گؤزلور، سني گؤزلور ، سني گؤزلور ...
***
دونيا حئيران دي بوگون !!!
گووه نير «تورك» اولوسون بير لييي نه
خالقيميز چون كي داياقدير هاميسي بير بيرينه
***
كيم بيليردي بو اولاي بير «آن»دا
اهر-ي، ورزيقان-ي هم هئريس-ي
قاراداغ بؤلگه سيني
تيتره ديب ، ائو له ري ، آلت- اوست ائده جه ك؟!!
***
اونودولماز قاراداغ فاجيعه سي
ورزيقان حاديثه سي
اهر ايله هئريس-ين زلزله سي
***
واي سسي توتدو بو گون اؤلكه ميزي
قاراباغ لا قاراداغ هر ايكيسي قان آغلير
تورك اولوس دردله ره سون وئرمه يه ايلقار باغلير
خالق ثابيت ائله دي « ائل گوجو تام سئل گوجودور»
سوز قاليب دير آتالاردان كي « ائل ايله قارا گون بايرام دير»
***
گل درين باخ
آنادان آيري دوشوب دور بالاسي
ايندي هر آذربايجان قاديني
آناسيز قونچالاري
باغرينا باسمالي دير
***
قملي لاي لاي لا بو گون
آناسيز كؤرپه له ري
آنا تك ديزله ري نين اوستون ده
دينج يئر سالمالي دير
***
بيلميريك بيز كيمه گؤز ياشي تؤكه ك؟
آتالار يا آنالار؟
قوجالار يا كي جاوان لار؟
بالاجا خيردا اوشاق لار؟
سود امه ر كؤرپه فيدان لار؟
هانسي نا؟ هانسي لارا؟
بيز كيمه ؟ كيم له ره ؟ گؤز ياشي تؤكه ك؟
***
قان اولوبدور اوره يي اؤلكه ميزين
گئنيش عالم ده بو گون
زلزله سئچدي بيزي
آما بيلسين بو جفا كار فلك
بو وفاسيز دونيا
آدي باتميش دئپره م
حددي يوخ اؤفكه ميزين
دورومو چوخلو پريشاندي نئچه بؤلگه ميزين
آما چوخدور دؤزومو اؤلكه ميزين
***
دار باخيش لا بيزي تحقير ائلييه ن له ر
حاققي پامال ائده ن له ر
ميلله تي پاك اونودان لاردا گره ك بيلسين له ر
باش اوجا تورك اولوسو
اوجامان اود يوردون
داغيدانماز دئپره م
سينديرانماز بو جفا كار فلك
آييريب ، محو ائده بيلمه ز
بيزي مين له ر جه اولاي
زلزله ، سئل يا توفان
***
اوجامان خالق لارا يوخدور اؤلوم
دونيا بيلسين ديري دير ميلله تيميز
چون كي دار گونده جوشور قئيره تيميز
آذرِبايجانا عيززه ت يارادير هيممه تيميز
دونيا وار كن اونودولماز آديميز
اوجالار فرياديميز
***
آز زامان دا
اوچولان ائو له ريميز
خالق الي ايله
يئنه آباد اولاجاق
يارديما موحتاج اولان يوردلارا
ان گوزه ل شكليده ايمداد اولاجاق
***
قاراداغ دا ياشايان ديلداشيميز
باجي ميز ، قارداشيميز
جان – جييار قانداشيميز ، سيرداشيميز
قم- كده ر ، قوصصه له ري گئتديكجه
اونودوب شاد اولاجاق
دار گونون عؤمرو چوخ آزدير
حاق وئريب وعده كي بير گون
«كؤتولوك له ر كؤكو بر باد اولاجاق »
***
ايندي بيز نئيله مه لي؟
نه دير اينسان گؤره وي؟
بو آغير فاجيعه ده
جان ياخان حاديثه ده
بوللو دردله ر يارادان زلزله ده
هر وطنداش يا كي ديلداش گؤره وي
بللي دير آيدين دير
او كي پروانه كيمي
اؤلكه عشقينده يانير
يا وطن دردي قانير
يا او اينسان كي سئوير اينساني
بير بير ايله بير اولوب يول بير اولوب
خالقا قارداش يا باجي اولمالي دير
***
ديلداشيم گل بو آغير فاجيعه ده
بير اولاق ، يول بير اولاق
« ائل گوجو ، سئل گوجودور »
